الزهايمر (AD ) ج 2

السلام عليكم ورحمة الله وبركاته

المره ده هنتكلم ان شاء الله على الحاجات اللى ممكن نعملها واللى نبعد عنها علشان نخلى الزهايمر يبعد عنا ونحفظ الزاكرة بتاعتنا اطول فترة ممكنة

اول حاجة هى الرياضة واتكلمنا فى الجزء الاول على انها من العوامل اللى بتأخر او بتقلل من فرص اصابة الشخص بالمرض , النهارده هنوضح ازاى انها بتعمل كده :

تعرفوا يا جماعة ان الرياضة بتخلى الانسان فرحان بمعنى ان ممارسة الرياضة مثلا زى المشى او الجرى او السباحة بتخلى الانسان فرحان !!!

انا عارفة ان فى ناس ممكن تقول انه غلط ومش توافقنى الرأى وناس ممكن تقول صح , نرد الاول على الناس الموافقة ونقولهم اذا انتم كنتم ماشيين فى اى يوم لفترة معينة

وحسيتم انكم فرحانين فده شئ عادى ( لان المخ بيفرز مادة كيميائية اسمها السيروتونين (serotonin ) والماده ده بيفرزها المخ لمحاربة الاكتئاب والافكار السيئة اللى ممكن الانسان يكون بيفكر فيها قبل ما يمارس الرياضة )

اما الناس اللى مش موافقين على ده يبقى ممكن علشان هم مثلا عندهم زيادة فى الوزن والرياضة وقتها بتتعب المفاصل و دول انصحهم انهم يمشوا على نظام لانقاص الوزن

مع الرياضة وان شاء الله يحسوا بفرق كبير , الاحتمال التانى ان عندهم مرض زى القلب او تصلب شرايين او التهابات فى المفاصل او النقرس ودول برضو بيعملوا رياضة

بس لازم متابعة مع الدكتور المختص . اما الناس العادية واللى وزنهم طبيعى بالنسبة لطولهم وسنهم فأكيد هيحسوا بالفرح بعد ما يعملوا رياضة .

والدراسات اثبتت ان ممارسة الرياضة لمده 30 دقيقة 5 مرات فى الاسبوع بتقلل من احتمالية الاصابة بالمرض الى 35 % , فياريت كل واحد مننا يحاول يعمل رياضة

كل يوم وممكن نبدأ بالتدريج الاول وبعدين نزيد المدة يعنى ممكن نبدأ بـــــــ 10 دقائق ونزيد لحد ساعة فى اليوم وده يبقى جميل جدا , ومش لازم تبقى فى الشارع او

النادى ممكن نعملها فى البيت او البالكون او نطلع السلم وننزل بدل المصاعد او ننسق الحديقة . يعنى الرياضة ممكن تبقى بسيطة جدا من تنظيف البيت ,المشى , الجرى ,

السباحة ,لحد رفع الحديد والانشطة العنيفة وهكذا ...

على فكرة علشان اى حد يتعود على روتين جديد اكيد محتاج وقت وغالبا بيكون لمدة 28 يوم علشان يبقى عادة عنده .

فاكرين زمان لما كنا نقف فى طابور الصباح فى المدرسة , التمارين ده كنا بنعملها اجبارى وخلاص بس الحقيقة ان كان عندهم حق لان التمارين ده برضو كانت بتخلى

المخ يفرز مادة كيميائية قوية اسمها الاندورفينس (endorphins ) والمادة ده بتنشط المخ و الروح وبتزيد من التركيز

ده كان دور الرياضة المهم , ودلوقتى نقول دور الاكل ... لازم يكون صحى ومفيد للمخ :

معظم الاطباء والباحثين بينصحوا بأتباع نظام وجبة البحر الابيض المتوسط وقصدهم بها الوجبة اللى فيها سمك او السكان المعتمدين على الاسماك كمصدر بروتين حيوانى

نظرا لقربهم من شواطئ البحر الابيض وده لان السمك غنى بالاحماض الدهنية الغير مشبّعة والمفيدة للجسم واشهرها ( اوميجا-3 ) وكمان موجودة فى المكسرات والحبوب الكاملة

وبينصحوا كمان بتقليل تناول الاطعمة المصنعة والمحتوية على الحليب كامل الدسم والزيوت المهدرجة ( زى السمن النباتى ) واللحوم الحمراء وكمان الاطعمة المحتوية على نسبة عالية

من السكر المكرر والكربوهيدرات البسيطة لانها تمتص وترفع نسبة السكر فى الدم بسرعة وبتسبب التهاب فى المخ مع مرور الوقت .

الاحسن تناول الخضروات والفاكهة بألوانها المختلفة وخاصة تناول الخضروات الورقية الخضراء يوميا (زى الجرجير والخس ...) وده طبعا لان نسبة الفيتامينات ومضادات الاكسده

موجوده بنسبة عالية فى الخضروات والفاكهة . كمان تناول كوب او اثنين من الشاى يوميا للشخص العادى وده برضو لان فيه مادة مضادة للتأكسد ولكن بعيدا عن مواعيد تناول الوجبات.

ثالث واخر حاجة فى النصائح هى ... تنظيم مواعيد النوم والاستيقاظ وعلاج توقف التنفس اثناء النوم ممكن بسبب ( الشخير ) واللى جايز نتيجة ارتفاع ضعط الدم او التدخين او تناول الادوية

المهدئة او زيادة الوزن وبيكون عادة لمده 10 ثوانى .( اظهرت دراسة بجامعة كاليفورنيا ان 70 :80 % من مرضى الزهايمر عندهم توقف التنفس اثناء النوم ( sleep apnea )

حاول تتنفس بعمق وتحدد وقت قصير كل يوم ولو حتى 10 دقائق للارتخاء والراحة وتبعد عن الحاجات اللى بتشتت الانتباه ( زى المزاكرة امام التليفزيون كده مثلا !!! )

واخيرا حاول كل فترة تلعب اى لعبة فيها تفكير علشان تنشط مخك . وربنا يبعد عنا الزهايمر .

المصدر : .HelpGuide.org

الزهايمر (Alzheimer's disease)



السلام عليكم ورحمة الله وبركاته

النهاردة اول موضوع ليا ويارب يعجبكم ان شاء الله ونستفيد كلنا , ده اول جزء من الموضوع والتانى ان شاء الله بالليل النهارده

واعذرونى على التأخير فى التدوين ويارب الاسلوب يكون كويس . ويمكن اخترته الاول لانه بيزيد كل سنة واتمنى انه يقل بعد كده ويختفى خالص من عندنا.

( الزهايمر) عبارة عن خلل بيحصل فى المخ وثبت فى دراسات كتير دلوقتى انه نتيجه ترسيب بروتين معين فى المخ والبروتين ده مكون من حوالى

36 : 43 حمض امينى و يسمى بــــــ(اميلويد-بيتا بروتين ) وشكله معقد وده بسبب نشاط بعض الانزيمات فى المخ .

واتسمى المرض ده بالزهايمر نسبه للعالم والطبيب الالمانى

　

(Alois Alzheimer )

واللى بدأ فى وصف المرض واكتشاف اعراضه سنة 1906 .والى الان يصرف مئات الملايين على الابحاث التى تجرى سنويا عن المرض واتفق معظم اخصائيين المخ والاعصاب على تعريفه بــــ ان (الزهايمر مرض يحدث تدريجيا ويقوم باضعاف المخ وعادة ما يكون

قاتل ) وحيث انه يقوم تدريجيا بتدمير خلايا المخ فالاعراض برده بتبان تدريجيا وبتبدأ بــــــــ :

مشاكل الاول فى التفكير وبعدين فى الزاكرة وبعدين فى التصرفات والسلوك , يعنى الانسان يبدأ الاول فى نسيان اسم حد مثلا كان عارفه او مثلا

ينسى مكان مفاتيحه وبعدين بيتطور الوضع لحد لما يصل لشغله ويبدأ يقل عمله او يكون غلط او يحس انه مش قادر يشتغل ومش قادر يحكم على اى

موقف اذا كان صح او غلط , بردوا ممكن يكون سأل على حاجة وناس جاوبته ومع ذلك يفضل يسأل برده كأنه مش سمع الرد وده مش رخامه

منه يعنى بس بيبقى غصب عنه , بعدين بقى بيدخل فى مرحلة اصعب شوية وهى انه بيضيع حاجات كتير وممكن يتوه لانه نسى عنوان بيته

وينسى الكلام ولا يعرف يعد حاجه او يحسب وكمان ممكن ان مزاجه يتغير فجأه يعنى يكون هادى ومره واحده يتعصب ويرجع هادى تانى

بعد دقائق من غير سبب واضح . وطبعا مع تطور الوضع التعامل معاهم بيبقى اصعب واصعب وبيحتاجوا معامله خاصة .

طبعا فى اعراض من المرض اى حد ممكن تحصله ومش بيبقى عنده الزهايمر وده عادى اذا كانت مش على طول ومش بتسوء يوم عن يوم

لان اصعب حاجه فى المرض ده انه تدريجى ولازم الانسان يكون واعى ومهتم بأى حاجه تحصل معاه واذا اتكرر اعراض مثلا من المرض عليه

كتير يبقى لازم يسأل ويبدأ تانى يراجع نفسه ويشوف ايه غلط فى اسلوب حياته ويغيره او اذا كان مريض بمرض معين ياخد العلاج بانتظام ويبعد

عن الاهمال فى نفسه .

اكيد كل واحد مننا بيسأل نفسه ياترى انا عندى الزهايمر ,او ياترى انا ممكن يبقى عندى لما اكبر اذا ربنا اراد وكبرت ولا لآ ؟؟!!

الحقيقة يا جماعة انا دورت كتير وهدور تانى ان شاء الله على كل سبب يزيد من احتمالية الاصابه بالزهايمر , لكن اكتر الاسباب الواضحة

والمثبوتة علميا هى ان:

1- العمر: معظم الابحاث اثبتت ان نسبة الاصابه بالمرض بتزيد مع التقدم فى العمر وخاصة بعد سن 65 سنة ( ده طبعا مش شرط) لان فى كتير

ناس بتصاب بالمرض بعد 70 او 80 او اكتر ويمكن مش تصاب به خالص وده يعتمد اكتر على اسلوب حايتهم من الاول ,بمعنى ان كلما كانت

الحياة صحية كلما قلت نسبة الاصابة كتير وده ان شاء الله هنتكلم عنه بالتفصيل بعدين .

2- العامل الجينى : يعنى فى جينات وراثية معينه تزيد من نسبة الاصابه بالمرض , بمعنى انه مثلا لو عم المريض اوجده كان عنده المرض ده

فبكده نسبه او احتمالية ان الانسان من نفس العائلة للاصابة بالمرض بتزيد كتير خاصه اذا كان مستواه الصحى سئ .

3- الامراض : وخاصة امراض القلب والاوعية الدموية , يعنى مثلا انسان عنده ارتفاع فى ضغط الدم او مرض القلب او تعرض لازمة قلبية

قبل كده او غيبوبة او عنده تصلب فى الشرايين ونسبة الكوليستيرول عالية مثلا ( غالبا بيقال عن مرضى تصلب الشرايين وارتفاع نسبة

الكوليستيرول ان عندهم ملف الدهون فى الدم سئ او ( ( bad lipid profile) طبعا لان كل الامراض ده بتؤثر على نسبة الجلوكوز والاوكسجين الذاهب

للمخ وتدريجيا بتدمر الاوعية الدموية من القلب واوعية المخ وطبعا اذا لم تعالج بعناية بتسبب السكتة الدماغية (الجلطة )

واثبتت الدراسات حديثا ان حوالى 80% من مرضى الزهايمر هم بالفعل مصابين بمرض القلب والاوعية الدموية .

وطبعا فى امراض تانية زى السكر والسمنة برضوه بيزيدوا نسبة الاصابة .(وان شاء الله هنتكلم عن كل واحد منهم بعدين )

4 - عدم ممارسة الرياضة والاهمال فى تنظيم مواعيد الوجبات ومحتواياتها : وده للاسف مشكلة موجودة عند كتيرمننا , يعنى بجد يا جماعة

كل واحد كان مهمل فى نفسه يبدأ يغير فيها للاحسن ويشوف ايه احسن حاجة موجودة ويطور نفسه وخاصة بعد الحمد لله مصر اتغيرت

وبدأت بداية جديدة احنا كمان لازم نتغير وكل واحد يشوف هو ممكن يساعد فى ايه عشان يطور بلده واهله واصحابه ونفسه وبجد والله

الحياة هتبقى رائعة طالما كل واحد مخلص ومجتهد ومتوكل على الله ( معلش سامحونى عشان خرجت شوية من الموضوع بس الحقيقة

ان ده اهم )

5- عدم التواصل الاجتماعى والبعد عن ممارسة الانشطة الثقافية : وفعلا ده عامل مهم جدا ومثبوت علميا ان الناس المرتبطين ببعض

اجتماعيا واسريا زى مثلا الاصحاب مع بعض او الاحفاد والاجداد والاباء اذا كانوا مثلا تعودوا على انهم يقوموا بدور او نشاط معين مع

بعض زى الرسم او قراءة القصص او الخروج للنادى او يعملوا اى حاجة فيها حركة وتجديد زى طرح فكرة جديدة او هواية جديدة

وممارستها نسبة او احتمالية اصابتهم بالمرض بتقل كتير جدا مع تقدم العمر لانها بتنشط المخ والجسم مع بعض .

6- عدم الانتظام فى مواعيد النوم والاستيقاظ او السهر لفترة طويلة وعدم الراحة وزيادة الاعباء والضغوط على المخ تزيد من احتمالية

الاصابة بالمرض بشكل كبير.

وبكدة يكون خلص الجزء الاول والنهاردة ان شاء الله بالليل اعمل الجزء التانى من الموضوع

المصادر:
1\

healthguidance.org

2\ hopkinsmedicine.org

3\Alzheimer's association.

هل تعلم :

ان كل ضربة من ضربات القلب تضخ حوالى 20: 25 % من الدم الى الرأس , وان خلايا المخ تأخذ على الاقل 20 % من الغذاء

والاوكسجين المحمول فى الدم !!!!

الى اللقاء فى الجزء التانى " اختكم تنة ورنة "

الافتتاح

السلام عليكم ورحمة الله وبركاته

النهاردة ان شاء الله بفتتح مدونتى العلمية واللى انا عملتها لخدمة الناس وهى مشروع خيرى غرضه نشر المعرفة

ويارب كل انسان يستفيد منها واى حد عايز ينقل موضوع بعدين ومن غير اذن منى  انا موافقة وان شاء الله هحاول

انى اعمل الموضوعات بالعربى واترجمها انجليزى علشان كل الناس تقدر تستفيد وطبعا هكون سعيدة جدا ويشرفنى

انكم تشاركونى ارائكم وتعليقاتكم وان شاء الله كلنا نستفيد.

الحقيقة ده اول مدونة ليا ويمكن حاسة بتوتر شوية فياريت تسامحونى المره ده